روايه تحفه جديده
_ في حاجات بتختفي من البيت، والله العظيم حاجات كتير جديدة مش لاقياها
_ما تدوري كويس يا مريم هتكون بتروح فين يعني
_ يا نوح صدقني أنا مش مهملة، أنا عارفة مكان كل حاجة فين، و مش برمي حاجة، و لما بدور على الحاجة لسه جايباها مش بلاقيها
_سمي بس بسم الله وهتلاقيها هتروح فين يعني؟!
_ والله في حاجة مش طبيعية في البيت
_انتِ بتتوهمي، ما حاجتي موجودة و الدنيا زي الفل
_ اشمعنى حاجتي أنا!
_مش يمكن دا إهمال منك!
_ إهمال مني! أنا بخرج برجع مش بلاقي الحاجة، مهو يا إما البيت مسكون يا في حرامي بقا
_ طب أهدي، هنلاقي الحاجة بإذن الله بس متعصبيش نفسك بسيطة بسيطة
أنا بجد كنت هتجنن، دي مش أول حاجة تختفي، ويتبقى حاجات جديدة، في الأول ماكنتش اخده بالي، لكن لما الموضوع زاد، بدأت أخد بالي و أركز أكتر
حاولت اتغاضى عن الموضوع، و نزلت عند حماتي في اليوم إللي بعده
فضلت قاعدة معاهم، لكن لاحظ إنها لابسه شبشب كنت جيباه للبيت جديد
_ أي دا حضرتك جايبة منين، كنت جايبة واحد زيه، بس ماعتش لاقياه
_ قصدك أي يعني بالكلام دا! أنا بنتي إللي جيبهولي و هي خارجة، هو مفيش غير شبشبك في السوق
_ أكيد مش قصدي يا طنط، أنا بس في حاجة غريبة في البيت الأيام دي مضايفاني
_ حاجة أي ؟
_ حاجات كتير بتختفي من البيت، مش عارفة بجد بيحصل أي، أنا الموضوع قلقني
_ هيكون في أي يعني هتلاقيكي بتحطيها في مكان وتنسي هي فين
_ كنت مفكرة كدا، لحد ما بقيت أركز، ولقيت برضو بتختفي، بحطها و اخرج أرجع ملقهاش
_ بتحصل بتحصل، المهم بخري الشقة و شغلي قرآن
_ هو في حاجة ولا أي! بسم الله الرحمن الرحيم
_ يوه خايفة من أي! دا ما عفريت إلا بني آدم
عدى كام يوم، و كنت مركزة في كل حاجة بعملها، بس اكتشفت إن في بيجامة بحبها اختفت لما رجعت من عند ماما، حسيت إن مخنوقة جدًا من إللي بيحصل
فنزلت اشتكي لطنط و أنا بعيط
لكن اتصدمت لما لقيت أخته بتفتح وهي لابسه نفس البيجامة اللي اختفت
_ أنتِ جايبة البيجامة دي منين!
_ و أنتِ مالك؟!
_ البيجاما دي كانت عندي ولسه جديدة و اختفت فاجأة
_ طب و أنا مالي، أنا لسه جايباها جديد
_ جيباها منين؟!
_ هو تحقيق! تقصدي أي بكلامك دا أصلًا؟!
خرجت مامته من جوا على صوتنا العالي
_في أي! في أي يا ولاد مالكوا
أخته اتكلمت بعصبية
_تعالي يا ماما شوفي، الهانم بترمي كلام إن سرقت منها البيجاما، بقولها أنا شارياها، قالتلي لا دي بتاعتي
