أحببت جاهل بقلم إيمان شلبي
كنت في حيره وصراع يطول شرحه بالمعني الحرفي …
مش عارفه ايه مستقبلي مع شخص معرفهوش مشوفتهوش غير مرتين من الاساس وفي المرتين اتكلمنا كلمتين بالتقريب !
كنت مستغربه هو ليه عمل كده ؟ ليه اصلا يوافق علي لعبه زي ديه ..
استغربت وجوده النهارده قدام الكليه ..
معقوله يكون معجب بيا وعاجبه الحوار ..
ممكن لو طلبت اسيبه يهددني أنه هيقول لأهلي الحقيقه واننا مش بنحب بعض من الاساس !!
فوقت من شرودي علي دخول ماما وهي بتقولي استعد عشان اطلع …
اخدت نفس طويل وخرجت من الأوضه وانا حاطه وشي في الأرض …
– تعالي ياشهد تعالي سلمي ..
قربت من أهله وسلمت عليهم وانا مبتسمه بأهتزاز وتوتر …
اول ما قربت منه سلمت عليه وانا بتجنب احط عيني في عينه …
– قمر والله
قالها بخفوت وانا برقت عيني وبلعت ريقي بتوتر وانا ببصله بتحذير وبقول بهمس ..
– احترم نفسك …
قولت كلامي وروحت قعدت ..
وبعد التعارف والاتفاقات وانا مش معاهم …
كنت حاسه اني في دنيا تانيه ،دنيا مفيهاش غير انا ومحمد ..
الظاهر أن اللي كنت خايفه منه طول حياتي حصل ..
حصل وحبيت شخص مش مناسب !
كنت دائماً بلوم علي الناس اللي بتحب اشخاص جاهله بالمعني الحرفي مع انهم متعلمين …
كنت دائما استغرب ازاي ؟ كنت بسألهم بكل سخريه ووقاحه …
فاكره مره واحده ردت عليا رد مقدرتش اقتنع بيه غير دلوقتي ..
” ساعات الحب بيخليكي تتغاضي عن حاجات كتير اوي بيخليكي تتنازلي عن حق من حقوقك مفيش مبادئ في الحب ياشهد ”
غمضت عيني وانا بمنع نفسي اعيط بمنع نفسي من التفكير …
مينفعش اتنازل عن مبادئ لازم اكمل عشان اوصل لكل اللي عايزاه مينفعش حاجه توقفني عنها حتي لو كان الحب …حتي لو هدوس وهقسي علي قلبي
عمري ما كنت قاسيه اوي كده علي نفسي بس لازم اتعلم اكون كده
لازم اتعلم اختار اللي يناسبني …
فوقت من شرودي علي صوت بابا وهو بيسألني …
– ها ياعروسه ايه رأيك ..
فركت ايدي وانا ببص لمؤمن اللي في كتير من محمد حتي صوته !
حتي ريحه البرفيوم بتاعته وكأنهم توأم …
هزيت راسي وقرينا الفاتحه وقربت مني أخته مايا وهي بتحضني بفرحه ..
– مبروك يا عروسه
ضحكت ضحكه مصطنعه وانا برد بلطافه …
عقبالك ياقمري
رفعت ايديها لفوق وهي بتقولي بهمس
– ياااارب المتعوس علي عينه يحس ويتنيل يتقدم انا ثانيه كمان ثانيه وهروح أقوله عمر تتجوزني
