أحببت جاهل بقلم إيمان شلبي
نفسي اكون زي البنات اللي مصاحبه أهلها ،نفسي احكي لماما كل حاجه من غير خوف حتي لو غلط بس احكيلها لاني عارفه انها هتسمعني وتعرفي الصح من الغلط …
بس للاسف ماما ابسط ما عندها تروح تحكي لبابا تروحي تقول العيله كلها بنتي عملت كذا وكذا وتخلي الكل يلومني وتخليني اندم اني حكيت وفضفضت معاها …
عشان كده بقيت بسكت بكتم كل حاجه جوايا….
بس في النهايه هي امي وانا بحبها ،عارفه انها كمان بتحبني
عارفه انها بتخاف عليا بس حبها صعب شويه يمكن في نوع من القسوه لكنه حب ام لبنتها الوحيده في النهايه ….
تاني يوم
كنت واقفه قدام المرايه بسرح شعري بشرود وحزن وانا محتاره هعمل ايه في الورطه اللي حطيت نفسي فيها
منين هجيب حد يمثل أنه بيحبني ويخطبني عشان أهرب من جوازي من ابن خالتي …
الشخص السمج ،ابتسامته الخبيثه كفيله تعصبني ،نظراته المُريبه بتخلي كل ذره فيا تتنفض …
منين اخترعوا اني معجبه بيه
منين وانا كل ما اشوفه أهرب في أي مكان واقفل الباب عليا من الرعب !
اخدت شنطتي والفون بتاعي وخرجت من البيت ..
نزلت اخدت اوبر ووصلت قدام الكافيه ودخلت قعدت وطلبت قهوه
كنت مستنيه ” محمد” يوصل وانا بفكر بشرود …
– اتأخرت عليكي انا اسف
– ولا يهمك اتفضل
– انتي كويسه ؟
– انا تمام تحب نبدء دلوقتي ولا ترتاح من السكه شويه ؟
– بس أنتي شكلك مش كويسه خالص
– خلاص بقي انت هتصاحبني ؟! كويسه ولا مش كويسه انت مالك
قولت كلامي بكل عصبيه وقله ذوق وهو قاعد يبصلي بهدوء …
– خلصتي ؟!
– خلصت ايه بالظبط ؟!
– ولا حاجه عموما انا اسف اني اتدخلت في اللي مليش فيه يالا نبدء
قال كلامه بنبره حزن وانا ضغطت علي ايدي بندم وانا بمنع نفسي اعيط قدامه ..
كنت مخنوقه اوي ،كنت محتاجه اعيط واحكي لحد اللي انا حاسه بيه ..
مليش صحاب ولا حتي ليا أهل تسمعني ..
مليش غير ربنا
اخدت نفس عميق وانا بحاول اكون ثابته وبدأت اشرح وهو كعادته مش مركز غير فيا !!
وقفت شرح مره واحده وانا بسأله بتلقائية …
– تتجوزني
– هه
– بقولك تتجوزني
– انتي بتكلميني انا ؟
– ايوه بكلمك انت تتجوزني
– ب بس
– بص يا محمد احنا مش هنتجوز يعني
– اومال ايه مش فاهم ؟!
– انت هتيجي تتقدملي ونتخطب لفتره معينه ونفركش ..
– ليه ؟
– ب بص بصراحه كده في عريس متقدملي وانا مش موافقه عليه والعريس ده يبقي ابن خالتي
وانا قولت لماما أن في واحد زميلي هيتقدملي وان احنا بنحب بعض
ومش عارفه اتصرف ازاي ،انا معرفش حد ولد غيرك فلو سمحت تساعدني …
