أحببت جاهل بقلم إيمان شلبي
كنت بقف بكل ثقه وثبات أشرح لزمايلي في الكليه يوم العملي …
مش فاهمه اشمعني هو الوحيد اللي اتوترت قدامه ،كنت بطلع الكلمه بالعافيه وكأني طفله لسه بتتعلم الكلام …
– انتي كويسه يا انسه؟!
– هه ا انا تمام تمام
– اوك يالا نكمل
– انت فاهم حاجه اصلا؟؟
– جدا فاهم جدا ياريت كل المدرسين زيك ..
قال كلامه وهو بيبص في عيني بعيونه اللي كأنها مغناطيس …
معقوله في حد بالجمال والوسامه والكاريزما ديه !
حقيقي الظروف صعبه اوي الدنيا مش عادله أبداً لشخص زي في كل المواصفات الحلوه لكن ناقصه أهم صفه …
خلصت شرح وانا طول الوقت بحاول مبصش في عينه عشان بتوترني نظراته
كنت طول الوقت باصه في الورقه وانا بشرح وحاسه بعيونه مفارقتش ملامحي
مكانش مركز في الشرح اكتر ما هو مركز معايا …
– وبعدين بقي يامحمد؟!
بصلي وقال ببراءه: انا عملت ايه ؟
– ركز لو سمحت مينفعش كده
– طب مانا مركز ،مركز اوي
قال جملته وهو بيسند ايده علي الطربيزه بهيام …
نفخت بضيق وانا بهبد القلم علي الطربيزه وبقول بعصبيه …
– لا بص بقي عشان نبقي متفقين كده شغل التسبيل والهبل ده مش بحبه احنا مش جاين نتجوز انت جاي تتعلم عشان تستفاد وانا جايه أعلمك عشان اتنيل اتخرج من جامعه كامبردج فرع الشاطبي تمام؟!!
حط رجل علي رجل وهو بيبصلي ببرود : طب وهو انا عملت ايه دلوقتي انا كنت مركز معاكي جدا
– لا واضح كل شويه تبص يمين وشمال وتسبلي لا واضح جدا انك كنت مركز …
– انتي عصبيه كده علي طول
– ميخصكش
– طب تمام عموما لو حابه تتأكدي اني كنت مركز انا ممكن اسمعلك كل حرف قولتيه
– هه في المشمش
– مش مصدقه
– صراحه لا وشكلك كده هتسقط وتسقطني معاك
– طب هسمعلك ..
قال جملته وبدأ يسمع كل حرف قولته بالتفصيل وانا ببصله بذهول وأحراج في نفس الوقت …
الظاهر اني فهمت غلط …
– ها لسه مُصره علي رأيك ؟!
– احم احم برافو احنا كده خلصنا النهارده بكره ان شاء الله نتقابل في نفس المعاد
– تمام وبالمناسبة شكلك حلو وانتي متعصبه بصراحه عمري ما شوفت ميس قمر كده باي باربي …
قال جملته الآخيره وهو بيغمزلي بعينه وبياخد الفون والمفاتيح بتاعته وبيمشي من قدامي بعد ما حط حساب اللي طلبته …
اما عني وشي كله بقي احمر ،قلبي كان بيدق بطريقه غريبه وانا ببص لآثره وبقرب ايدي من مناخيري وانا بشم ريحه البرفيوم بتاعته اللي طبعت في أيدي لما سلم عليا …
