أحببت جاهل بقلم إيمان شلبي

– فوقي ياشهد فوقي مينفعش
………………………………………………………………….
-ها عملت ايه شكت في حاجه ؟!
– عيب عليك وانا عبيط ولا ايه
– طب عملت ايه احكيلي ؟!

– تعرف باربي؟!

لقيته بيرفع حواجبه وعلامات الاستفهام واضحه علي ملامحه وهو بيقول ببلاهه :
-باربي العروسه ؟
– ايووون بالظبط
– مالها عايز واحده تلعب بيها ولا حاجه ؟!
– ظريف يالا
– مانا مش فاهم ايه علاقه باربي بالموضوع حضرتك ؟!
– هي يا ” مروان” هي شبهها اوي انا مستغرب ازاي ربنا حط الجمال ده كله في شخص واحد
انت متخيل وانا قاعد قدامها كنت بعمل حركات مراهقين ،انا مؤمن الزناتي اللي مكنش حد بيهزه جت هي من غير ترتيب شقلبت حالي في ثواني !!

كنت بحكي بشغف وانا ساند بأيدي علي المكتب وبفتكر العيون اللي سحرتني بجمالها
بفتكر اول ما شوفتها ازاي قلبي دق ازاي همسلي اروح عندها ..

– انت حبيتها يامؤمن ولا ايه ؟!
– باين كده
– بس متنساش ان احنا بنكذب عليها
– تفتكر لما تعرف الحقيقه هتكرهني؟!
– اكيد هتضايق
– طب اعمل ايه ؟!
– ما تعترفلها بكره
– ايه انت بتهزر
– أومال هتفضل مكمل في لعبه انت مش عارف نهايتها ايه ؟!
– حاسس انها هتحبني
– حتي لو حبتك لما تعرف الحقيقه هتبعد عنك
– انت ليه بتقفلها في وشي يامروان ؟!
– عشان خايف تحبها يامؤمن خايف هي متبادلكش نفس الشعور ساعتها مش هستحمل اشوفك تعبان بسببها ..

اتنهدت وانا بسند ظهري علي الكرسي وبغمض عيني ..
بحاول اطرد الأفكار ديه من دماغي،بحاول اتخيل انها هتحبني وبس هتسامحني لما تعرف اني عملت كده عشان انا حبيتها …

– مش هتسامحك هتكرهك اكتر وخاصه انك هتخليها تسقط
– ومين قال كده انا هزور الشهاده وهدخل الامتحان
– مش خايف حد يشوفك في الأمتحان ويعرفك؟!
– مش خايف من حاجه المهم عندي هي
– للدرجادي ؟!
– واكتر يامروان واكتر لما تجرب الحب هتفهم

– وانا لسه هجربه مانا عارف
– عارف ايه ؟!
– هه م مفيش
– مروان انا عارف علي فكره
– ع عارف ايه بالظبط
– عارف انك بتحب ” مايا” اختي
بس احب اعرفك حاجه حاول تنساها عشان انا مش هجوزهالك يامروان

لقيته بصلي بصدمه وعيونه اتملت بالدموع وهو بيسألني بذهول.
– ليه يامؤمن ؟ انا وحش في ايه
– انت مش وحش بس مايا بتحب واحد زميلها في الكليه وجاي يتقدملها …