أحببت جاهل بقلم إيمان شلبي
– ا الو
– نمتي ؟!
شيلت الفون من علي ودني وانا ببص علي الرقم باستغراب وحطيته تاني وانا بقول باستغراب ..
– محمد انت بتكلمني من رقم غريب ليه ؟
– بس انا مش محمد انا مؤمن
– لا بتهززززر !!!
-ليه مش فاهم مش انا خطيبك !
– بس انت وهو صوتكم كوبي من بعض
– احنا اصلا شبه بعض انا ومحمد واحد مفيش ما بينا فرق ..
– ده ازاي يعني ؟!
– لا متاخديش في بالك انا كنت بكلمك اتطمن عليكي يالا تصبحي علي خير ..
قال جملته وقفل وانا ببص الفون بذهول …
– عبيط ده ولا ايه ؟
…………………………………………..
فات اسبوع ..
كنت كل يوم بقابل محمد ،كل يوم بحاول أتجنب ابص في عينه اللي أصبحت بتجذبني ليها من غير ما احس ..
كل يوم كنت بحاول أتجنب ارد علي مؤمن ..
بالرغم اني محستش ابدا أنه شخص مش لطيف ،كان يشبه محمد في كل حاجه بالتقريب …
النهارده الامتحان اللي هيحدد مستقبلي ومستقبل محمد …
كنت واقفه قدام اللجنه متوتره بشكل ..
قررت اكون معاه النهارده بناء علي طلبه …
كنت مستغربه ليه يطلب مني حاجه زي كده ،قالي عندي ليكي خبر حلو بعد الامتحان …
كان عندي فضول كبير اعرف ايه هو ؟
بالرغم من خوفي من الخبر بالرغم من احساسي أن في حاجه هتحصل النهارده بس مش مهم المهم اني اعرف …
كنت واقفه سرحانه لدرجه اني محستش بيه وهو بيخرج من اللجنه وبيقرب مني …
– هيييي روحتي فين ياقطه
– هه محمد عملت ايه طمني حليت كويس ولا هتسقط وتسقطني جالك ايه ع..
– بس بس ايه بالعه راديو اهدي أنا حليت كويس جدا ..
اتنهدت وانا بحط ايدي علي قلبي براحه …
– الحمد لله
– شكرا علي كل حاجه يا شهد
قالها وهو بيبص في عيني بعيونه اللي أصبحت مؤخراً بحب ابص فيها …
هزيت راسي بجمود وانا بمنع مشاعري تبان وتفضحني …
– ا انا كمان بشكرك يامحمد اتمنالك الخير
– شهد أنا كنت عايز اقولك حاجه
بلعت ريقي وانا بهز راسي بخوف
– ا اتفضل
– ش شهد أنا بحبك
غمضت عيني جامد وانا بضغط علي ايدي وبتنهد بتعب ودموعي رافضه ترحمني …
– شهد مالك انتي كويسه ؟؟
فتحت عيني وانا بقول بنبره أوشكت علي البكاء : مينفعش يامحمد مينفعش عن اذنك ..
قولت جملتي وانا بلف ظهري وبمشي من قدامه وانا بسمع لدموعي تنزل علي خدي …
– حتي لو قولتلك ان مؤمن ومحمد واحد !
