روايه ظلمات لا تنسى
-أنا آسف يا دكتور وصال أعصابها تعبانة شوية.
حاول أن يرسم ابتسامة مجاملة علي وجهه ولكنه فشل في ذلك وغمغم بتريث:
-حصل خير يا بشمهندس أخت حضرتك تقدر تروح لأي دكتور غيري وبإذن الله خير ويتم شفائها علي خير.
تنهد “وائل” بضيق وأردف ممتنًا:
-تمام يا دكتور شكراً لحضرتك.
آذن العصر فور عودتهم إلي محافظة الشرقية واتخذتها وصال حجة وانسحبت عنهم لأداء صلاة العصر حتى لا تترك لهم مجال للحديث.
عادت “وجدان” من عملها وجدت والدتها وشقيقه يجلسون وعلى وجههم امارات الحزن، اقتربت منهم وألقت السلام:
-سلام عليكم ورحمه الله وبركاته.
رددوا السلام:
-وعليكم السلام ورحمه الله وبركاته.
جلست بجوار والدتها وتداركت مستفهمة:
-خير يا ماما في إيه مالكم ؟ وفين وصال؟ والدكتور قال إيه ؟
أجاب “وائل” بحزن:
-مع الأسف عندها كانسر في المخ.
شهقت بصدمة، وهي تضرب على صدرها بخفة:
-يا مصيبتي السودة كانسر.
عاتبها شقيقها بحزم:
-اسمها اللهم أجرنا في مصيبتنا واخلفنا خيرًا منها.
تجاهلت حديثه وتساءلت بتلهُف:
-طيب وصال فين ؟ ورد فعلها إيه ؟
أشارت والدتها إلي الغرفة بحزن:
-قاعدة في الأوضة من آول ما رجعنا غير أنها رافضة العلاج أصلاً.
ضيقت عينيها واستفسرت:
-طيب قالت لمازن ؟
توجهت نظرات شقيقها لها بضيق وقال:
-إحنا في وصال ولا في سي مازن ده كمان ؟
أجابت بتلقائية:
-الله مش عشان يلغي الفرح ولا يشوف هيعمل إيه ؟ أكيد مش هيتجوز مريضة كانسر يعني رجليها والقبر.
لو كانت النظرات تقتل لوقعت صريعة الأن صاحت والدتها بتوبيخ :
-إنتِ ايه بجد ؟ مجنونة ؟ ولا هبله ولا بتستهبلي ولا إيه بالظبط يا بنتي ؟ دي أختك توأمك يا هانم أقل واجب تقومي تقعدي جنب أختك دلوقتي تهوني عنها مش تفكري في خطيبها ؟
تدخل وائل في الحوار مهدئًا:
-إهدى يا ماما لو سمحتِ وجدان أكيد زعلانة علي وصال بس التعبير خانها.
تهكمت وفاء قائلة:
-التعبير خانها طيب خلينا في المهم هنعمل إيه مع وصال؟ لازم تتعالج شوف دكتور تاني.
تسألت بفضول:
-هي مش متابعة مع دكتور؟
أجاب وائل بحزن :
-دكتور يونس كويس فعلاً يا ماما بس المشكلة أن وصال رافضة الكيماوي.
ضربت وجدان كف بكف وهتفت ساخرة:
-بجد رافضة الكيماوي أمال هتتعالج إزاي؟!
رمقها وائل محذرًا وأضاف بنفاذ صبر:
-إيه رأيك تقومي تتكلمي معاها وتقنعيها تتعالج أفضل وصال رافضة تتعالج بالكيماوي حتى لو النتيجة أنها تموت مش فارق معاها .
