روايه ظلمات لا تنسى
-أنا عندي ورم في المخ يا مازن .
ظل يرمقها بعدم تصديق وسرعان ما انفجر ضاحكًا مرددًا بعدم تصديق:
-حرام عليكِ يا وصال فال الله ولا فالك تبشري على نفسك بالمرض ؟
تبسمت بهدوء وردت:
-مين قالك إني بهزر أنا بتكلم جد أنا عندي ورم في المخ.
سقط الفنجان من بين يديه وتسأل بحذر:
-وصال إنتِ بتقولي إيه ؟ ده مش وقت هزار علي فكره ؟
“وأنا مش بهزر أنا بتكلم جد”
نطقتها بسلاسة وهي تتأمل تعابير وجهه الذي بهت لونه.
إبتلع ريقه بصعوبة شديدة وتسأل:
-إنتِ إتأكدتي فعلاً أن عندك كانسر وعرفتي إمتي وإزاي ؟
ردت بهدوء:
-التعب إلي كان عندي من فترة والدكاترة هنا مكنوش عارفين هو إيه أخو صديق وائل لما عرف الحالة طلب أشعة وتحاليل سافرت عملتها امبارح واتأكد أن فيه ورم في المخ فعلاً.
إمتعض وجهه وصاح موبخًا:
-يعني إنتِ عارفة من إمبارح قبل ما أكلمك اقولك إني هركب الطيارة وجاي ؟
حركت رأسها بإيجاب:
-أيوة.
اشتعل وجهه بغيظ وقال:
-ليه مقُلتيش ليا إمبارح كنت قدرت أتصرف ؟
ضيقت عيونها بعدم فهم وتداركت مستفهمة:
-اتصرفت إزاي ؟ أنا مش فاهمة كلامك؟
أجاب بنفاذ صبر:
-كنت لغيت الحجز ومرجعتش مصر.
جعدت جبينها بحيرة وتسألت:
-لغيت الحجز؟ ومرجعتش مصر طيب وأنا والفرح؟
تجهم وجهه ونظر لها نظرة خاوية خالية من أي مشاعر:
-فرح إيه ؟
ردت بحذر:
-فرحنا أوعي تكون بتفكر تأجله لغاية ما تعالج؟ أنا محتاجة ليك جنبي يا مازن.
آخذ نفس عميق وتحدث بنبرة حادة:
-جنبك إزاي؟ سيبك من جنبي والكلام الفاضي ده خلينا في المهم الدكتور قال إيه بالظبط فيه أمل ؟
كانت تحدق به كأنه شخص غريب عنها لم تعهده من قبل فما بالك بعشق المراهقة والشباب فمازن مان يماثلها بالعمر قد كانوا بالمرحلة الإعدادية والمرحلة الثانوية في نفس المدرسة وكذلك نفس الفصل، نشأت بينهم علاقة صداقة وطدت بالمرحلة الجامعية رغم أنهما كانا بكليتين مختلفتين إلا أنهم كانت علاقتهم مستمرة حتي تقدم في خطبتها في عامه الأخير بكلية التجارة، أما هي كانت في عامها الأخير بكلية الآداب قسم اللغة الفرنسية، ليقرر السفر فور تخرجه كي يعمل ويكون نفسه وجلست هي في إنتظاره ثلاثة أعوام كاملة وها هما علي مشارف تتويج حبهم ولكن علي ما يبدو أن للقدر رأي آخر.
فاقت من شرودها على صوته:
-هتفضلي سرحانة كده كتير؟ ردي عليا الدكتور قال إيه ؟
