روايه ظلمات لا تنسى
لمع وميض عينيه بإعجاب:
-بسم الله ما شاء الله ربنا يقوي ايمانك كده قطعنا نص الطريق الصعب وجه النص التاني السهل الممتنع مرحلة العلاج.
تنهد وائل بحزن وتسأل:
-يعني حضرتك خلاص إتاكدت يا دكتور إنه ورم في المخ ؟
رمقه بإشفاق:
-أيوة أنا عارف أن الوضع صعب عليكم بس ده قضاء ربنا ولازم نرضي به لأن مفيش وقت لازم نبدأ مرحلة العلاج في أسرع وقت كل لما كان الوقت بدري
في العلاج افضل.
لم تستطع “وفاء” أن تظل علي صمتها وتسألت بصوت متلهف:
-يعني فيه أمل تخف وترجع زي زمان وكمان ميرجعش تاني يا دكتور ؟ طيب إيه سبب المرض ده؟
قرر التخلي عن دوره كطبيب واتخذ دوره كإنسان يريد أن يطمئن قلب أم علي فلذة كبدها:
-بصي يا حجة الكانسر مرض زي أي مرض ملوش سبب مرض من عند ربنا زي باقي الأمراض وبإذن الله تخف وترجع زي الفل كمان بس ده محتاج وقت وعلاج وعزيمة وبإذن الله كل حاجة هتبقى تمام.
تبسمت “وفاء” بحزن وأكملت بمغزي:
-بس الكانسر مش زيه زي أي مرض يا دكتور حضرتك بطمني وخلاص.
حرك رأسه بيأس ورد بعملية:
-مممم هو الطبيعي أني أطمنك بس نتكلم بالعقل الكانسر فعلاً زي أي مرض مجتمعين في حاجة واحدة أنهم بيدخلوا جسم الانسان يدمروه سواء سكر سواء ضغط أو غيره هو أه اصعبهم واشرسهم ويمكن علاجه صعب سواء العملية أو الكيماوي أو حتى العلاج بالإشعاع بس هو في النهاية مرض ولازم نبدأ معالجة بحذر وحايطة ونتقبله يا ست الكل أما بقي المرض جه منين هرجع أقولك إنه زي أي مرض دخل الجسم ممكن يكون بسبب وراثي وممكن خلل چيني وممكن من غير سبب خالص كمان ومن هنا بقي السؤال المهم كان فيه في العائلة أي حالة كانسر ؟
حركت راسها بنفي وردت:
-لأ يا دكتور.
صمتت قليلاً وأكملت بحذر:
-بس هي ليها توأم ممكن تكون مصابة بكانسر هي كمان ؟
تحدث بعملية:
-لأ طبعًا مش شرط إلا إذا كان الكانسر ناتج عن خلل جيني وده أنا مستبعدة جدًا لأن الورم كان هيظهر في مرحلة الطفولة.
توجه بنظراته إلى “وصال” واستطرد بإبانة:
-إحنا هنبدأ الأول جلسات الكيماوي وبه…
“بس أنا مش هاخد كيماوي يا دكتور”
جملة حاسمة ألقتها علي مسامعه بجدية تامة، ألتفت لها بحيرة وتسأل:
-مش هتاخدي كيماوي إزاي مش فاهم؟
ردت باختصار:
-الكيماوي لأ أنا معنديش مشكلة مع المرض راضية الحمد لله ولو حتي مليش عمر لسه وهموت يبقى أموت وأنا على أرض صلبة مش وأنا شايفة نظرات الحزن والشفقة من أقرب الناس ليا.
